Suliassat, takorluukkat naleqartitallu

Suliassat

"Peqqinnissaqarfiup suliassaasa pingaarnersaraat innuttaasut peqqissusiisa siuarsarnissaat, nappaatit nappaatinullu assingusut pinaveersaartinnissaat kiisalu inuit nappaatillit nappaatinullu assingusunik nappaatillit misissornissaat, katsorsarnissaat paarinissaallu. Suliassaminik pilersaarusiornermini peqqinnissaqarfiup anguniassavaa peqqinnissaqarfiup sullissinerinut assigiimmik periarfîssaqartitsisoqarnissaa sumi najugaqarneq apeqqutaatinnagu" (Inatsisartut peqqussutaat nr. 15, 6. november 1997-imeersoq)

Takorluukkat

Peqqinnissaqarfik - inuiaqatigiinni, suliffimmi innutaasunik, sullitanik napparsimasunillu sunniivigeqatigiinnermi akisussaassuseqartoq ineriartorfiusorlu.
Peqqinnissaqarfik:

• Nukissanik sapinngisamik pitsaanerpaamik atuiffigisarput
• Pitsaaliuinermi nakorsaanermilu innuttaasup akuutinneqarnissaanik ukkassiffigisarput
• Imminut tungiornermik paasinninnissamik siuarsaavigisarput
• Sapinngisamik amerlanerpaanut anngukkumalluta ilisimasanik teknologimilu nukissanik nutaanerpaanik
atuiffigisarput.

Naleqartitat

Peqqinnissaqarfiup aaqqisuussaanera naleqartitatsinnik sisamaasunik; tungiuinermik, tatiginninnermik, ataqqinninnermik ilinniagaqassutsimillu ikorfartueqataassaaq.
Aaqqisuussaanerli apeqqutaatinnagu aaqqisuussinerni sutigut tamatigut suleqatiginnissinnaassaagut. Peqqinnissaqarfimmi suliassat tamatta suliassaraagut; nalinginnaasumik aalajangersimasumillu–napparsimasumut sapinngisamik naleqarnerpaamik pilersitsisoqarsinnaaqqullugu tamatigullu napparsimasoq salliullugu- ”suliniuteqartitsisinnaassaagut”.

Peqqinnissaqarfimmi qullersat

Peqqinnissaqarfimmi qullersat tassaapput nunatsinni Peqqinnissaqarfimmi pingaarnertut aqutsisut pingasuusut: Aqutsisoqarfiup pisortaa, peqqissaasut qullersaat nakorsallu qullersaat. Peqqinnissaqarfimmi qullersat peqqinnissaqarfik tamakkerlugu aqutsisuupput.
Peqqinnissaqarfimmi qullersani pingasuusuni akisussaaffiit ima agguataarsimapput:

Aqutsisoqarfiup pisortaa Peqqinnissaqarfimmut pingaarnertut akisussaasuusoq. Aqutsisoqarfiup pisortaa aaqqisuussaanikkut Peqqissutsimut Naalakkersuisoqarfiup ataani inissisimavoq.

Peqqissaasut qullersaat Peqqinnissaqarfimmi peqqissaanermi pingaarnertut akisussaasuuvoq. Peqqissaasut qullersaat aaqqisuussaanikkut aqutsisoqarfiup pisortaata ataani inissisimavoq.

Nakorsat qullersaat Peqqinnissaqarfimmi nakorsaanermi pingaarnertut akisussaasuuvoq. Nakorsat qullersaat aaqqisuussaanikkut Aqutsisoqarfiup pisortaata ataani inissisimavoq.